Joekskepel Sôkkerpáek, aafdeiling zoépkemissie | Opgemak in Januari 1990 | Herzeen april 2011

1. De leeje
André Reijnders en Jasper Vossen

2. Organisaasiesjema
Ierste lid: André;
Twiëde lid: Jasper;
Eventueel rongkbringlid: idderein;
In opleiding: idderein.

3. Taakverdeiling
't Aajste lid van de kemissie bepaolt 't tempo van drinke en guëf auch 't moment aan waorop 't besjtelle gebeurt. 't Jongste lid meug genne koep plege door in aafwezigheid van 't aajste lid sjtiekem de kepel zat te vore. Allein as de kepel d'r öm vruëg, of zelfs sjmeekt, meug hae eigenmachtig drank haole.

4. Algemeine bepaolinge
Zoeas ontliend aan de statute van Sôkkerpáek...

a. aan 't opgelagde en aangegaeve tempo meug zich nemus onttrekke op gevaor aaf dette auch nemus miër is. Allein in noëtgeval meug det. Onger noëtgeval verssjteit de kemissie: de neiging kriége om sjpaorliene te beklumme, al träötend in sjlaop te valle of euver einen draod te hange en de blome te voore.

b.  Auch de modderbuizers heuve ut tempo neet te volge. Det wuurt eur zelfs aangeraoje want de kemissie veult zich auch veur eur gezonkheit verantwaordelik. De modderbuizers kriege eure rommel want de kemissie geit neemes taege eure zin in gelökkig make. Maar ze blief ut vraemp vinge.

c. 't Beer kump neet per maeter maar per blaad. Auch neet per sjtök. Eigelik leefs per eimer maar d'r zien kasteleins die dao wat op taege hebbe vanwaege 't aafraekene. De kemissie pas zich aan.

d. Wanniër d'r alkohol-vreej (pleur) besjtelt wuërt, begint de kemissie te lache en zaet : Nae. Raeje: 't gevaor is te groët det beej 't rongkbringe foute waere gemak en det eine onsjöldige dae rommel binnekrieg. Motto: Leever eine zatte pleurder in de baek dén eine neuchtere van Sôkkerpáek ...

e. Wat betref half – öm (modder) : de kemissie kump heej eine bepaolden tiéd aan tegemoet, zoelang ze door lawaai en drank neet zoedanig kleureblingk is gewaore det ze det per ongelök zelf drink.

f. De modderbuizer guef dit aan door zien besjtelling te beginne met: Sorrie, meug ich, veur deze kier…

g. Angere fris, zoeas sjpa en zoë duit minse met vastelaovend onnuëdig bubbele en wuërt dus allein maar besjtelt as emus zich persee de veut wilt wasse. Dit gölt neet veur koffie, waal veur tieje. Allein leeje die behuure toet 't "bijna" zien heej van oetgezongerd.

h. Auch sjofeurs zien oetgezongerd.

i. Soms haet men tevuel gezjwet: ut waterige gedeilte is den weg en den alkohol blief achter. De zuuveringsinsjtallaasie lup den vas. Ut simptoom is det dae rampzalige sjneller geit drinke as den beermeister en den ister dus ech get mis. In det geval meug sjpa besteld waere. We wille gen verwoestijning.

j. Cola wuërt allein besjtelt om de träöt te sjmaere, neet de sjträöt.

k. Beej 't sjpeule wuërt in 't algemein gén beer rongkgebrach; wae toch wilt drinke meug det, asse nog get in veurraod haet. Hae meug allein drinke as hae doorsjpeult en tegeliek nao de zaal glimlach.

5. Biezongere bepaoling

a. Wanniër men eine bekinde tref waomit men ein glaas wilt drinke, den wuurt men verzôch det in princiepe neet van de kas te doon, al is de kemissie dao in neet flauw. Maar vraog den leever gen bon maar laot de kemissie ug de drank euverhandige. De kemissie môt aandringe op begrip want 't geit um oelesbonne en zoë.

b. Beejdrage in de koste löp via Tom.

c. Den beermeister meug neet weite watter te bestaeje is. Ut teoretiese gevaor is den detter gedronke wuurt naormate de kas geld haet. Det ken noets de bedoeling zien.

6. Laeveslöstige en dorstige wiesheid as niej motto

Ein Glück dass wir nicht saufen,

Wir lassen es langsam laufen.

Wer auf Gott vertraut,

Im Sommer Kappes klaut,

Der hat im Winter, Winter…Sauerkraut.